Mat 14 | ASO | STEP | A'mine gameneu' nene Izesu' guvele monivo guvelesi ve Helode' nene giline'.

Matthew 14

Mono' Noso Holo-ngedaa' Ive Zohane' Hiline' Gamazi

(Maleko' 6:14-29; Luka' 9:7-9)

1 A'mine gameneu' nene Izesu' guvele monivo guvelesi ve Helode' nene giline'. 2 Gelo gelekele' izipahala nene ti' lo lo-ngimine': Mene ve nene mono' noso holo-ngedaa' ive Zohane' noloseive. Bele helekuvoni' mauti' otine' ne'mo ato ato' suno daa' amuzo nene ezela neivosa ato ato' suno nene nodaloseive line'. 3 Ne'mine line' nene hazamu' lamive. Gomu' gala'muda vomine Helode' aza akunolo Hilipo' elenaho Helodia'ni gumine dani'. Gumine davo mono' noso holo-ngedaa' ive Zohane' ne'mo akuna'mi elenahine daine' nene lisihe' amive lo Helode'ni lo-eme'mo vo minine'. Ne'mine lo lo-eme'mo vo minivo nemu' Helode' aza Helodia'nimu' ogo a'mine Zohane'ni nene vi dalizave lo evene' ma ngimiselavo vi analo' di nalava imi ele'mizi di vi nala' numungu' huli-dani'. 5 Helode' aza Zohane'ni bele helelesa giline'za evene' nete Zohane'nimu' nene polohete neive li gili nizanako lo ehelele izavo hulo-mikine'.

6 Ne'mine ogavo neivo Helode' soto' ine' gamene ogavo ei' numungu' di gese' igi noso' nite' ni nizavo evene' muki' neti ve'nido' Helodia' aluvo ne'mo denisi ine' nene Helode' ningine' umo goloso hiline'. 7 Umo helavo a'mine alu ne'mo inite' ma geleline' inite' nene ha emelesuve lo O'moso'mi velelo' nolo hukuve lo lo hukine'. 8 Ne'mine lo lo hukavo alungo nene izeleho gala do lido' lido' ogo Helode'ni ti' lo lo-imine': Mono' noso holo-ngedaa' ive Zohane' godolo nene giti lapeseu' mili di nimilo. 9 Lavo guvelesi ve Helode' aza eii lo gelo agae lo giline'za aza mo O'moso'mi velelokisi ezesi maka' minaveti ve'nidokisi gamazi lo huko lo neine' ma nenako Zohane' godolo nene di di alo lo 10 evene' ngimiselavo vi nala' numungu' luvono giti 11 godolo nene di igi alungo nene imikevo do vo izelehine imine'. 12 Ne'mine ikevo Zohane' izipahala zuho ingine oko'no've nene di vi galese izi-di Izesu'ni vi li-imani'.

Izesu' Aza Evene' Faef (5) Tauseni Noso' Nite' nGimine' Gamazi

(Maleko' 6:30-44; Luka' 9:10-17; Zohane' 6:1-14)

13 Li-imikevo gelo Helode' ezemu' line' gamazi nesi mo gelo a'mine minine' ebe' nene hulo sipiu' dizavo izipahala zuho a'mingu' ele'mizi vi angise'inevo' minilizada ebe' ga'meta vani'. Ido' nivavo evene' muki' nemu' gili tauniti' tauniti' misubou' e'meti vilida vi vi hukani'. 14 Ne'mine ikevo Izesu' aza a'mine ebe' ga'meta nene vo hetelo sipiuti' lemo a'mida evene' vai' di gese' igi nizavo ningo mulumo'ine gelo engikuti' inite' ngisive nene do lamine' o-ngidine'. 15 Ne'mine ogo neivo nivenga' molavo izipahala zuho ingine Izesu' neida igi ti' li lani': Mene ebe' nene evene' nizamani' hadivelo' nonivo nivenga' mo molaze. Evene' muki' mene vi avita minani' numuno ebekuti' angise'ine naliza noso' nite' meni hizilizangisi ngimisele hulozo. 16 Ne'mine likevo Izesu' ti' lo lo-ngimine': Nanimu' vilizave. Lengi' nene noso' nite' di ngimilevo. 17 Ne'mine lo lo-ngemavo izipahala zuho ingine lani': Noso' nite' lelita nene sikoni faefusi alaha' sitakisi moda a'nevo' neive. 18 Likevo aza line': Nene di nouvoda alo. 19 Ne'mine lo evene' nene guviselo' mito' minilizave lo Izesu' lavo li-ngidikevo minani'. Nizavo Izesu' aza sikoni faef nesi alaha' sita' nesi nene do Okulumoto' vonu' noogo O'moso opo'ni lo a'mine noso' nite' nene gito apilo izipahala zuho ize' molo ngemavo evene' nene di moni ngimani'. 20 nGimikevo evene' mukito' ni gatu'ine ani'. Gatu'ine ogavo izipahala zuho ingine lumo sama hulani' nene gosuvaha' tuvelu (12) ne'mine go'zi vai' lani'. 21 Noso' nite' nani' nene vemoho' faef tauseni (5,000) ne'minelite nani'za vene' izipe nene gatamune.

Izesu' Noso Avilelo' Lise Lise Vine' Gamazi

(Maleko' 6:45-52; Zohane' 6:15-21)

22 Ido' evene' nene noso' nite' ni osu' likevo neloti' Izesu' aza izipahala zuho nene sipiu' dizi noso helala gomu' nivilizave lo ngimiselo aza nene evene' muki' numu'nida ngimisele hulo hulo' ogo minine'. 23 nGimisele hulo osu' lo golola eikovo' O'mosola lolosa dizo vine'. Eikovo' dizo vo a'mida mino O'mosola lo neivo liti'muso izine'.

24 Liti'muso izavo izipahala zuho nene misubo huli hoto' igi noso olusoto' nivavo hepe' naba ne'mo ve'nidati' ogo noso nene sipilo' beleka' beleka' ivo vivi' vivi' igi minani'. 25 Ne'mine i'mi nivavo go' lo'mo lomo nedenga' fo kiloku he faef kiloku he nela nene Izesu' aza noso avilelo' lise lise nizada ani'. 26 Nizada noso avilelo' navo ningi golise goloso gili mene holoso neive li ngehelele izavo geke' lani'. 27 Geke' lani'za a'mido' geto Izesu' gamazi lo-ngemo ti' lo lo-ngimine': Neni' ma ne nouze. Lengehelele izamivo mini ngi li minilo. 28 Ne'mine lavo Petolo' ti' lo line': Guvekasi ve gaza nene mo gei' lamine' noo ma nene lanivo nosolo' nene ogo gei' nanida alove. 29 Ne'mine lo lavo anevo lo Izesu' lavo Petolo' aza sipiuti' lemo api' ogo noso avilelo' lise lise Izesu' neida volosa ine'. 30 Volosa ine'za novo hepeli'mo noso biline' nene ningo vono vavo golise giline' ne'mo nosoli'mo do su'mize-delesa ine'. Ne'mine ogavo Petolo' asi lo ti' lo line': Guvekasi ve do nu' izevo. 31 Lavo Izesu' geto ogo ana hulo do hozi nolo-do ti' lo lo-imine': Gaza nenikumu' gele ele'vole' amo noso'mo nebelelihe nebelamilihe lo nanimu' gaka sita' gelane. 32 Ne'mine igi sipiu' dizikesivo hepe' nene zou lo matine'. 33 Hepe' nene matavo sipiu' minave ingine opo'ni li gubi' izi imi lamineto' gei' nene mo O'moso'mi gipele nane li li-dani' ve.

Izesu' nGenesalete Misubola Evene' Inite' nGisine' Do Lamine' O-ngidine'.

(Maleko' 6:53-56)

34 Ne'mine igi noso helala vii nGenesalete misubouko heteli sipiuti' limani'. 35 A'mida nene evenelite Izesu'ni nene ningi guni ani'. Ne'mine igi a'midoti' numudo' numudo' gamazi hulikevo evene' inite' gizi dave nene do lamine' o-ngedelive li ngele'mizi ezela igi 36 amuzo mili ti' li li-imani': Okongalo' inite' lolovolokovo' nevone di gililizadotikisi nene lamine' ilizani' nenako nemu' nene gele ngemanivo di gililizave li lani'. Ido' oko'nolo' inite' lolovolo' di gilave muki' nene mo lamine' ani' ve.